Ikastaroa

Plazak mugatuak dira (gehienez 25 pertsona ikasgela eta aste bakoitzeko)

Hiru aste horietako bakoitzean, gai desberdinak landuko dira: eraldaketa plastikoa, marrazketa naturala eta hiri-ikuspegiak

Parte-hartzaileek prestakuntza horren barneko aste bat, bi edo hiru egin ahal izango dituzte.

Bilboko Berreginen Museoak artearen eta prestakuntzaren aldeko apustua egin du aurten ere. Hori dela-eta, marrazki eta pinturako ikastaro trinkoa eskainiko du uztailean, oraingo honetan, ikasgai berrituekin.

Matrikula online egin ahal izango da, ekainaren 8tik 15era (uztailaren 7ra arte, Hiri-ikuspegiak ikastarorako), Bizkaiko erakundearen webgunean (www.bilbokoberreginenmuseoa.eus). Onartutako ikasleen behin-behineko zerrenda ekainaren 16an argitaratuko da. Onartutako ikasleek, ekainaren 20tik 22ra bitartean, dokumentazioa aurkeztu eta matrikula egin beharko dute, helbide elektroniko honetan: info@bilbokoberreginenmuseoa.eus. Ekainaren 27an aterako dira behin betiko zerrendak.

Hiru bloketan banatuko da programa. Lehenengo astean, uztailaren 3tik 7ra (biak barne), eraldaketa plastikoa izango da gaia. Hurrengo astean, uztailaren 10etik 14ra (biak barne), marrazki naturala landuko da. Eta amaitzeko, uztailaren 17tik 21era (biak barne), hiri-ikuspegiak izango ditu ardatz. Horrela amaituko da hiru asteko ikastaroa.

Ikastaro trinkoak aste bat, bi edo hiru egiteko aukera eskaintzen du. Astebeteko prestakuntzak 160 €-ko kostua izango du (prezio murriztua, 110 €). Izen-ematea bi asterako egiten bada, 220 €-ko kostua izango du ikastaroak (prezio murriztua, 150 €). Eta, azkenik, ikastaro osorako izen-emateak, hau da, 3 asterakoak, 310 €-ko prezioa izango du (prezio murriztua, 220 €).

Online matrikula

Ikastaroetan parte hartzeko, beharrezkoa eta nahitaezkoa izango da matrikula online egitea, Bilboko Berreginen Museoaren webgunearen bidez (www.bilbokoberreginenmuseoa.eus). Webgunean egongo dira horretarako inprimakia eta ikastaroaren oinarriak, osorik. Izena emateko modu berri hau dokumentuak in situ erabili beharrik ez izateko erabaki da. Norbaitek etxean ordenagailurik ez badu, 94 679 02 55 telefonoan eskatu ahal izango du hitzordua, Museoaren ordutegian, jarduera horretarako erakundean egongo den ekipo batean matrikula egin ahal izateko.

Garrantzitsua da gogoraraztea aste bakoitzean gehienez 25 ikaslek parte hartu ahal izango dutela ikasgela bakoitzean.

“Eraldaketa plastikoa”

Uztailaren 3tik 7ra

09:30etik 13:30era

Astelehenetik ostiralera

Ikastaroan, Museoko bi pieza egiptoarren bi erreprodukzio txikiren gainean eskultura-eraldaketa bat egingo da. Normalean beste formatu batzuekin lotzen diren teknikak ikasteko aukera emango du. Horrela, marrazkia, polikromia, higadura, adizioa, collagea eta abar landuz, sormena lantzeko aukera ugari izango dira.

“Marrazketa naturala”

Uztailaren 10etik 14ra

09:30etik 13:30era

Astelehenetik ostiralera

Giza gorputz bizitik abiatuta marrazketa ikasteko aukera eskaintzen du ikastaro honek. Saio bakoitza hiru zatitan antolatu da: lehenengoa beroketako saioa izango da; bigarrenean, marrazketa naturala landuko da; eta, azkenik, bateratze-lana egingo da.

“Hiri-ikuspegiak”

Uztailaren 17tik 21era

09:30etik 13:30era

Astelehenetik ostiralera

Ikastaro hau perspektiban irudikatzen ikastera eta praktikatzera bideratuta dago. Saioak Museoaren instalazioetan egindako hasierako lan batetik abiatuko dira, eta, ondoren, kanpora irtengo da, eta hiri-paisaia erabiliko da irudikapen-eredu gisa.

INFORMAZIOA

Egin zure matrikula hemen: www.bilbokoberreginenmuseoa.eus