Gaurkotasuna

Berreginen Museoak eskaintzen dizkizuen jarduera eta ekitaldiei buruz informa zaitez.

Berriak

UNISOUND Berreginen Museoan (Azaroaren 17a. 20.00 h.)

Astelehena, 06 Azaroa 2017 15:04

Bidea: Gaurkotasuna

Funk, trap eta indie musika Uni Sound Bilbaon!

Bilboko Udalak, Gazteria eta Kirol Sailaren bitartez, Uni Sound Bilbao aurkeztu du, musika talde unibertsitarioak ezaguturazteko zein gauetarako plan ezberdinak eskaintzeko asmoz. Gauzak horrela, Uni Sound Bilbao azaroaren 15etik 18ra ospatuko da eta funk, elektronika, trap, indie edota rock-a protagonista izango dira, bai arratsaldez eta baita gauez ere. Sarrerak doakoak izango dira.

Kontzertuak Bilborock, Satélite-T, Shake, Badulake eta Dock-en ez ezik, Deustuko Unibertsitateko Aretoan, Bizkaia Aretoan, Berreginen Museoan edota Zazpikaleko Euskotren geltokiko hall-ean ere izango dira.

Hona hemen kontzertuen egitaraua:

    • Azaroaren 17a, ostirala:
      • Berreginen Museoa, 20:00: Pop synth/Post punk – Anlaki (Pamplona) + Serpiente (Bilbao)
      • Bilborock, 22:00: Punk-rock – Yawners (Madrid) + Lukiek (Bilbao)
      • Badulake, 00:00: DJs Rexxiana + Asthmatik
    • Azaroaren 18a, larunbata:

Ekimen hau “BilbaoGazteNight” programaren barne dago. Udalak berritzaile, bateratu eta jasangarria den gauerako aisialdirako eredu berria sortu nahi du, beti ere auzotar eta osasunarekin bat egiten duena.

KAFETXO BAT? Berreginen Museoan (URBANBAT Festibala)

Astelehena, 30 Urria 2017 13:04

Bidea: Gaurkotasuna

NETWORKING. Berreginen Museoan, 2017ko azaroaren 10ean 16.00etan

 

Kafea hartzen den bitartean, elkarrizketa informalak izateko gunea. Festibalean parte hartu dutenekin (hizlariekin, kolektiboekin, antolatzaileekin, laguntzaileekin…) sarea sortzeko eta harremanak eratzeko aukera.

Hartzazu zure kafe-dosia!

Informazio gehiago: https://6festival.urbanbat.org/eu/

Afroditari eskainitako erakusketa bat zabalduko da Berreginen Museoan, Begoñazpi ikastolako ikasleen ideia bati tiraka

Ostirala, 20 Urria 2017 09:39

Bidea: Gaurkotasuna

Bizkaiko instituzioak aldi baterako erakusketa bat antolatu du 2017ko urriaren 26tik 2018ko maiatzera bitartean, amodioaren jainko greziarra edo Venus erromatarra hizpide: Afrodita. Caos. Desioa. Sexo. Amodioa?

Bilboko Berreginen Museoak aldi baterako erakusketa berri bat zabalduko du: Afrodita. Caos. Desioa. Sexo. Amodioa? Begoñazpi ikastolako ikasle-talde batek proposatu zuen halako erakusketa bat antolatzea, izan ere, eskola-proiektu bat garatu zuten Bizkaiko instituzioarekin elkarlanean.

DBHko 4. mailako ikasleek hezkuntza-proiektu bat garatu zuten duela urtebete, Museoko funtsak eta espazioa abiapuntu gisa harturik. Ikastolako ikasleek formatu txikiko erakusketak diseinatu zituzten, irakasleen eta teknikarien laguntzaz. Ikasturtearen amaieran, ebaluazio-mahai bat antolatu zen: lanak aztertuta, konturatu ziren benetako erakusketa bat antola zitekeela Irene Campillok eta Olatz Gonzálezek (Pink Ladies) proposatutako lanaren harira: Amodioaren bila.

Orain, proiektua gauzatu du Berreginen Museoko lan-taldeak. Ikasleen abiapuntua hauxe zen: amodio-motak aztertu nahi zituzten (erromantikoa, anaiartekoa, platonikoa…), hainbat garaitako eskulturetan adierazten zenaren arabera, eta Afroditaren eta Venusen figurek haragiztatzen zuten amodioaren kontzeptuari tiraka. Museoak hasierako asmoa birplanteatu du, eta Afroditaren irudiari eman dio garrantzia: halaxe erakutsiko da amodioa oso ezberdin ulertzen zela Antzinako Grezian eta gaur egunean.

Otsailaren 14an, geziz eta haurtxo hegalariz betetzen da dena, maitasunari eskainitako eguna ospatzeko. Eros greziarraren eta Kupido erromatarraren bertsio modernoak dira haurtxo horiek. Eros, ordea, ez zen hain samurra, eta antzinako jendeak beldur itzela zion. Afrodita. Caos. Desioa. Sexo. Amodioa? erakusketan 11 obra eta 3 koadro-inpresio bilduko dira (bi Boticellirenak eta bat Rubensena), eta bete-betean erakutsiko da Afroditaren mundua, huraxe baitzen maitasunaren jainko greziarra eta Erosen ama.

Bidaia honi esker, jendeak jakingo du greziarrentzat indar kontrolaezin eta suntsitzailea zela amodioa. Gaur egun, Afroditak sortzen zituen pasioak krimen gisa ikusiko genituzke, izan ere, arrazoimena eta auto-kontrola birrintzen zuten, eta bortizkeria eragiten: bahiketak, bortxaketak eta bestelako krimen guztiz makurrak hauspotzen zituen Afroditaren indarrak.

Erakusketan hainbat eskultura erakutsiko dira (Miloko Venus, Cnidosen Afrodita eta Ludovisi tronua, besteak beste), eta hiru ataletan banatuko da: lehenik, Afroditaren izaera aztertuko da (jaiotza, nortasuna…); bigarrenik, amodioaren eta sexu-desiraren jainko gisa izandako eginkizunak aztertuko dira (desira hori aurreikusi ezina zenez, eta gizarteak kulturalki kontrolatzen zuenez, arriskua eta antsietatea zekartzan sarri, eta horri erreparatuko zaio bereziki); eta, azkenik, arakatuko da Afroditak eta haren mitologiak zer-nolako harremana zeukaten panteoi olinpikoko jainkotasun nagusiekin.

Erakusketa honek honakoak lantzen ditu: maitasuna, sexua, Grezia, mitologia… Merezi du erakusketa ikustea, egitasmo guztiz berezi batetik abiatu baitzen, gainera.

Aristogitonen bustoa aztertuko dute ostegun honetan “Artelana Bere Testuinguruan” programaren barruan, Bilboko Berreginen Museoan

Ostirala, 20 Urria 2017 09:14

Bidea: Gaurkotasuna

Bizkaiko instituzioak hitzaldi-sorta arrakastatsu honen hitzordu berri bat antolatu du, Atenaseko Tiranizidei dagokion eskulturaren harira. Hitzaldi bat eta bisita gidatu bat egingo dira (ostegunean, hilaren 26an, 18:00etan; sarrera, doan), eta, horien bidez, artelanaren erreferentzia artistikoa eta historikoak aztertuko dira

Ostegunean, hilaren 26an, obra berezi-berezi bat aztertuko da programa honen barruan, hain zuzen ere, Aristogitonen bustoa. Atenaseko tiranizidetako bat izan zen hura. Halako jarduerei esker, sakonago ezagutzen ditugu Bilboko Berreginen Museoaren bildumako piezak eta espazioak. Era berean, ezinbestean aipatu behar ditugu Bilboko Udala eta Bizkaiko Foru Aldundia, museoaren patronoak baitira eta museoan egiten ditugun proiektu guztiak babesten baitituzte. Hitzaldia 18:00etan hasiko da, eta sarrera doakoa izango da.

Itziar Martijak emango du hitzaldia: Museoko teknikaria eta hitzaldi-sortaren arduraduna da bera. Berak kontatuko digun moduan, Napoles hiriko Arkeologia Museoan dagoen Tiraniziden eskultura-sortako ale baten kopia da Museoan gordetako hau. Eskultura-sorta hori, era berean, brontzezko eskultura-sorta greziarraren kopia bat da, erromatarrek egina. Jatorrizko greziarra Antenorrek egin zuen, K.a. VI. eta V. mendeen artean.

Martijak, gainera, Harmodio eta Aristogiton maitaleen arteko istorioa ere izango du hizpide. Ez zuten haiek garaitu Hipias, Atenaseko tiranoa eta Psistratoren semea; edonola ere, tiranoa erori osteko borroka politikoaren garaian, askapenaren ikur politiko bihurtu omen ziren biak, eta, antza denez, K.a. 510. eta 490. urteetan bitartean, modu ofizialean hasi ziren herritarrak haiek gurtzen. Gurtza horren ondorioz, Tiraniziden eskultura-sorta eraiki zen, noizbait, Atenas hiriko Agoran. Huraxe izan zen diru publikoarekin ordaindu zen eta hiritar indibidualak omentzen zituen lehen estatua greziarra.

Xerxes Atenasera sartu zenean, bere erreinuko hiriburura eraman zuen eskultura-sorta, Susara; orduan, atenastarrak Kritiosi eta Nesiotesi eskatu zieten eskultura-sorta originalaren kopia bat egiteko, brontzez hura ere. Hurrengo mendean, Alexandro Handiak jatorrizko eskultura-sorta berreskuratu zuen. Gaur egun, bertsio erromatarrak baino ez dira gordetzen, eta ez dakigu zeren kopiak diren: Antenorrek egindako eskultura-sortarenak, edo, aldiz, Kritiosek eta Nesiotesek egindakoenak.

Lehen eskultura-sorta noiz egin ote zen, zalantza handiak daude horren inguruan, eta, era berean, ez dakigu noiz gurtzen ote ziren Tiranizidak Atenasen, ez eta zer familiatik zetozen Harmodio eta Aristogiton ere.

Piezari buruzko misterio horiek denak argitzeko aukera paregabea da Martijaren azalpenak aditzea, hitzaldi entretenigarria eskainiko baitu.

Hitzaldiaren ostean, jarduera osatzeko, bisita gidatu bat egingo da, eta eskultura bertatik bertara behatu. Ziklo hau erreferente argia da Museoaren programazioaren barruan, eta Museoaren alor pedagogiko eta kulturalaren erakusgarria da. 2006ko azaroan ireki zen berriro Bilboko Berreginen Museoa, gaur egungo egoitzan, Mariaren Bihotzeko eliza zaharrean. Bizkaiko hiriburuko museo zaharrenetakoa dugu: orain dela 80 urte eratu zen, eta, gisa horretako museoan artean, punta-puntakoa da, kalitate handiko berreginak baitaude bertan.

“ARTELANA BERE TESTUINGURUAN” ZIKLOA

•           Eguna: 2017ko urriaren 26a, osteguna

•           Ordua: 18:00.

•           Tokia: Bilboko Berreginen Museoa

•           Sarrera, dohainik; ez da izena eman behar aldez aurretik

Museoaren ordutegia:

•           Asteartetik larunbatera: 10:00-13:30 eta 16:00-19:00

•           Igandetan: 10:00-14:00

•           Astelehenetan eta jaiegunetan, itxita

RICKY HOLLYWOOD MUSIKARI FRANTSESAREN KONTZERTU BATEK INAUGURATUKO DU BERREGINEN MUSEOAN BAD-EN – BILBOKO ANTZERKI ETA DANTZA GARAIKIDE JAIALDIAREN, BESTE EDIZIO BAT

Asteartea, 17 Urria 2017 09:39

Bidea: Gaurkotasuna

  • Urriaren 20an hasi eta 29ra arte luzatuko den Bilboko Udalak antolatutako jaialdiak musika irekiera ekitaldia eskainiko du ostegun honetan, arratsaldeko 20:00etatik aurrera, sarrera librearekin.

Bilboko Udalak antolatzen duen BADek – Antzerki eta Dantza Garaikide Jaialdiak ostiral honetan hasiko du bere programazio eszenikoa, ohikoak diren La FuNdicIOn, Pabellón 6, BilbaoArte, Campos Antzokiko Kupula aretoa edo Bilborock agertokietan. Berreginen Museoak hasierako jaia jasoko du Ricky Hollywood musikari frantsesarekin. Musikariak “Le Modeste Album” bere lehenengo diskoa aurkeztuko du. Kontzertua Bilboloopers-ek eskainiko duen Dj saioarekin eta Gheada ikus-artisten –bideo jockeyak– proiekzioarekin osatuko da.

Ricky Hollywood, Stephane Bellityren ezizena da, azken belaunaldiko pop frantsesaren konposatzaile finenetakoa. “Le Modeste Album” bere lehenengo diskoa aurkeztuko du, pop dotorea eta perfekzionista, ukitu elektronikoz hornitua, abesti herrikoi frantsesaren figura handiak gogorarazten eta eguneratzen dituena.

Stephane Bellity, La Féline, Poster Moderne edo Melody’s Echo Chamber bandekin aritu zen Parisko eszenan, eta esperientzia horri esker behar beste hazi da musikari gisa, eta berme osoz ekin ahal izan dio bakarkako abentura berriari. Pare bat EPSren eta, Stephanek, Ricky Hollywood aktibatu aurretik, 2002 eta 2010ean, idatzi zituen 18 kantez osatutako “Mes Meilleurs Succès D’Estime” bildumaren ondoren, aurtengo maiatzean argitaratu du orain Bilbora dakarren lehenengo diskoa.

Kontzertua, Bilboloopers-ek eskainiko duen Dj saioarekin eta Gheada ikus-artisten proiekzioarekin osatuko da. Gheada, Bilbon dagoen ikus-entzunezko estudioa da, ikus-entzunezkoen munduan hamar urte baino gehiago daramatzaten eta 2013an euren ezagutzak eta esperientziak elkartu eta ikus-entzunezko estudioa sortzea erabaki zuten Raquel Duránek eta Rut Brionesek osatutakoa. 

Gheada izenarekin hainbat lan gauzatzen dituzte, ikus arteen alorrean, edukiak eta entretenimendua, motion graphics izenekoak, irekiera tituluak, bisualak eta zuzeneko bideoa. Gau Zuria, Úbiqa, Kabia Teatroa, Marie de Jongh, Kaleartean, Horman Poster edo Bilboloop talde eta ekitaldietarako lanak ekoiztu dituzte. Gheadak ikus lan espezifikoa sortu du BADerako, kontzertuak irauten duen bitartean agertokiaren alboetan egongo diren bi pantailetan eskainiko duena. 

Ohikoa denez, jaialdiak irauten dituen egunetan arte eszenikoetako profesionalei zuzendutako zenbait jarduera berezi egingo dira. Horrela, Poliana Limak dantza garaikide eta inprobisazio tailerra eskainiko du larunbatean, urriaren 28an, Berreginen Museoan, dantzako, antzerkiko edo zirkuko profesionalentzat eta ikasleentzat (10 euro). Tailerraren helburua, dantzak denboraren igarotzearen adierazpen poetiko pertsonalerako eskaintzen dituen aukerak taldean aztertzea izango da.

Swingak dantzan jarriko du Bilboko Berreginen Museoa

Asteartea, 03 Urria 2017 11:54

Bidea: Gaurkotasuna

Urriaren 8an, erakunde bilbotarrak Swing Museoan! jarduera arrakastatsua eskaintzen jarraituko du. Jarduera horrek artelanen artean dantza egiteko aukera eskaintzen du. (11.30 h.)

MUSIKA KORALEKO ETA INSTRUMENTALEKO HOGEI KONTZERTU INGURU EGINGO DIRA BILBOKO AUZOETAN URTEAREN AZKEN HIRU HILETAN (barikua, 2017/09/29. Berreginen Museoan)

Osteguna, 28 Iraila 2017 12:18

Bidea: Gaurkotasuna

Bilboko Udalak programazio oparoa bultzatu du abendura bitartean, besteak beste, Bilboko Udal Musika Bandaren eta Txistularien Bandaren kontzertuak, Akordeoien Orkestra Sinfonikoaren emankizunak Gabonetarako berariazko proposamenak izango ditugu.

Musika proposamen eklektiko hau entzuteko aukera Uriko zortzi barrutietan egongo da; Udala da sustatzaile nagusia, baina beste zenbait kultur erakundek ere parte hartzen du; izan ere, proposamen hau auzoetako musika-programazioa, Musikauzo, maiatzean eta ekainean egiten dena uriko barruti guztietan eta Auzoz Auzo, Bilbao 700 - III Millenium Fundazioak sustatutako ekimena, osatzera dator.

Horiek horrela, urte amaierarako programatutako jarduerek jarraipena izango dute hil honen amaieratik. Zikloari hasiera emateko, Bilboko Akordeoien Orkestra Sinfonikoak Bilboko Udalaren laguntzarekin lau kontzertu antolatu ditu zenbait kokalekutan, eta amaierako saioa, urriaren 27an, Azkuna Zentroko Kulturen Atarian. Emanaldi guztiak barikuz izango dira, 20:00etik aurrera.

‘Bilboko Akordeoien Orkestra Sinfonikoa’

“Auzoko kontzertua”

Lekua: Artelan Berreginen Museoa (San Frantzisko, 14 San Frantzisko)

Eguna: barikua, 2017/09/29

Doako sarrera

Ostegun honetan, Bilboko Berreginen Museoaren “Artelana bere testuinguruan” zikloko hitzaldian, San Frantziskoko lehengo Komentuko hondakin arkeologikoak izango dira protagonista

Ostirala, 22 Iraila 2017 09:51

Bidea: Gaurkotasuna

ARTELANA BERE TESTUINGURUAN BERRITUAK HARTU DU BILBOKO BERREGINEN MUSEOKO PROGRAMAZIO BERRIA

Programa honetan, hilean behin, Berreginen Museoko piezak aztertzen dira, doako hitzaldi eta bisita gidatu baten bitartez

Bizkaiko erakundeak lehen aldiz egingo du hitzaldi arrakastatsu hau berriki inauguratutako aztarnategian. Hitzaldi eta bisita bat eginda (irailaren 28an, ostegunean, 18:00etan, sarrera librearekin), aztarnategiaren erreferentzia historikoak aztertuko dira.

Ostegun honetan, hilaren 28an, hitzaldiak oso obra gonbidatu berezia izango du; hain zuzen ere, San Frantziskoko komentu izandako hondakin arkeologikoak. Horrelako jarduerei esker, hobeto ezagutu ditzakegu Bilboko Berreginen Museoaren bilduman dauden piezak edo, kasu honetan, lekuak. Bestalde, Bilboko Udala eta Bizkaiko Foru Aldundia, museoaren patronoak, aipatu behar ditugu, babesa ematen baitiote museoan egiten diren proiektu guztiei. Hitzaldiak doakoak izango dira, eta 18:00etan hasiko dira.

Oraingoan, indusketan parte hartu duen Leandro Sánchez Zufiaurre arkeologoak aztertuko ditu XV. mendeko komentu frantziskotarreko hondakin arkeologikoak. Aztarnategi garrantzitsua da, eta iragan irailaren 21ean ireki zen publikoarentzat. Egun hartan, Bilbo Zaharreko hainbat elkartek izan zuten aukera espazio harrigarri hori lehen aldiz ikusteko.

Hitzaldira doazenek aukera izango dute auzoaren eta hiriaren historia eta kultura aberasten duen leku harrigarri horrekin gozatzeko. Hitzaldia aztarnategian bertan izango da, eta parte-hartzaileak denboran zehar egindako bidaia batean murgilduko dira.

Jarduera osatzeko, ibilaldia egingo da hondakinetatik; hortaz, gunea zuzenean ikusteko ez ezik, txoko guztiez hurbiletik gozatzeko aukera egongo da.

Dagoeneko, ziklo hau erreferentea da museoaren programazioren barruan, eta museoaren alderdi pedagogikoa eta kulturala sendotzen ditu.

Bilboko Berreginen Museoa 2006ko azaroan berrireki zen gaur egun dagoen tokian, hau da, Mariaren Bihotza eliza zegoen lekuan, eta Bizkaiko hiriburuko museoetan zaharrenetarikoa da. Orain dela 80 urte sortu zen, eta genero honetan dagoen onenetakoa da, ikusgai dauden erreprodukzioen aukeraketagatik zein kalitateagatik.

“ARTELANA BERE TESTUINGURUAN” ZIKLOA

•           Eguna: 2017ko irailaren 28a, osteguna

•           Ordua: 18:00etan

•           Lekua: San Frantziskoko lehengo Komentuko hondakinak

•           Sarrera librea; ez da aurrez erreserbatu behar.

Museoaren ohiko ordutegia:

•           Asteartetik larunbatera: 10:00etatik 13:30era eta 16:00etatik 19:00etara

•           Igandeak: 10:00etatik 14:00etara

•           Itxita: astelehenak eta jaiegunak.

2017ko Ondarearen Europar Jardunaldietan jarduera ugari izango Bilboko Euskal Museoan eta Berreginen Museoan

Astelehena, 18 Iraila 2017 09:17

Bidea: Gaurkotasuna

Bisita gidatuak eta familientzako tailerrak eskainiko dira bi erakundeetan urrian zehar

Bizkaiko Foru Aldundiak berriro bultzatuko ditu aurten Ondarearen Europar Jardunaldiak, "Paisaia bizia. Paisaien eraikuntza Bizkaian" izenburuarekin. Kultur Ondareari buruzko sentsibilizazio programa handinahia da, Europar Kontseiluak sustatua, Europar Batasunarekin lankidetzan. Urrian izaten dira jardunaldiak, eta ondarearekin eta historiarekin zerikusia duten hainbat jardueraz gozatzeko aukera izango dute herritarrek.

Euskal Museoak eta Berreginen Museoak ere bat egingo dute jai kulturalarekin, eta doan eskainiko dizkiete bisitariei bisita gidatuak eta familientzako tailerrak. Hona hemen jarduera horiei buruzko informazioa:

BISITA GIDATUA.

Paisajes Conventuales | Komentu-bazterrak 2. San Frantzisko eta San Andres artean. (Eleiz Museoa arduratuko da 1. ibilbideaz)

Ibilbide gidatua

Topalekua: Berreginen Museoa

Ordua: 17:00etan

Egunak: urriak 4 eta 18 (euskaraz) eta urriak 11 eta 25 (gaztelaniaz)

Antolaketa: Berreginen Museoa eta Euskal Museoa.

Informazioa eta erreserbak: 944150231

Parte-hartzaile kopurua mugatuta dago.

Ibilbidean, aukera izango dugu San Frantziskoko Komentuaren hondar zaharberrituak ezagutzeko. XV. mendean eraiki zen komentua, baina kuartel bat jarri zen bertan XIX. mendean, dagoeneko desagertua. Ondoren, San Andres Ikastetxe zaharrera joango gara, Zamudioko Atearen –bertan dago gaur egun Euskal Museoa– eta Joan Santuen elizaren alboan, eta han ikusiko dugu nola joan zen berritzen antzinako Bilboren paisaia historiko aldakorra, gaur egungo egiturara iritsi arte.

FAMILIENTZAKO TAILERRA.

Paisajes aromáticos| Paisaia lurrintsuak

Familientzako tailerra

Klaustroa zen fraideen bizitzaren erdigunea. Harrizko patioa zen, bertan landatutako landareen paisaia berde eta lurrintsuez tindatua. Tailer honen bitartez, gazte zein helduek klaustroek izan zuten erabilera antzinakoenetako bat ezagutzeko aukera izango dute; eta klaustro batean egingo dugu hori, San Frantziskoko Komentu zaharrean, hain zuzen ere. Gune horretan, sendabelarrak eta belar lurrintsuak landatu, eta horien hainbat erabilera ezagutuko ditugu.

Topalekua: Bilboko Berreginen Museoa

Ordua: 11:00etan (2 orduko iraupena)

Datak: urriak 15 eta 29, igandeak

Euskaraz izango dira bi tailerrak

Jarduera guztietarako, aurretik eman behar da izena, 944150231 telefono zenbakian.

San Frantziskoko lehengo komentuko hondakin arkeologikoak ikusgai egongo dira Bilbon, Berreginen Museoaren eskutik

Ostirala, 15 Iraila 2017 11:37

Bidea: Gaurkotasuna

Bizkaiko erakundeak –berau da bisitak kudeatzeko ardura duena– Bilboko auzo horretakoei emango die aukera lehen aldiz gune hori bisitatzeko, datorren irailaren 21ean

Bilboko San Frantzisko auzokoMariaren Bihotza Plazaren azpian altxor bat dago ezkutatuta, eta hemendik aurrera hara doan edonork ikusi ahal izango du. XV. mendeko komentu frantziskotarra da. Plazan zundaketa arkeologikoa egin ondoren (izan ere, gune arkeologikoa izan zitekeela uste zuten), Alfontso Printzearen Kuartelaren hondakinak, XIX. mendekoak, eta San Frantziskoko Komentuaren hondakinak aurkitu ziren. Azkenik, indusketan eta espazio hori herritarrentzat berreskuratzeko lanetan urteak eman ondoren, Bilboko Udalak, Berreginen Museoaren bitartez, herritarrei aukera emango die San Frantziskoko lehengo Komentuaren hondakinez gozatzeko, irailetik aurrera egongo baitira ikusgai.

Aztarnategi arkeologikora egindako bisita gidatu horiekin, Berreginen Museoak zein museoaren patronoek, Bizkaiko Foru Aldundiak eta Bilboko Udalak, nabarmendu nahi dute leku horrek duen garrantzia, bai ondarearen zein historiaren ikuspuntutik.

Aztarnategia bisitatu ahal izango duten lehenengoak Bilbo Zaharreko auzotarrak izango dira. Irailaren 21ean, gehienez 20 pertsonaz osatutako taldeetan eta lau txandatan (11:00etan, 12:00etan, 17:00etan eta 18:00etan), lehen aldiz sartuko dira 2.000 m2tik gorako leku estali horretara, eta gunearen ikusgarritasunaz gozatu ahal izango dute. Lehenengo bisitara joan nahi dutenek aurrez izena eman beharko dute, 944150231 telefonora deituta edo Berreginen Museoko harreran (San Frantzisko kalea 14).

Beraz, Bilbok historiaz jositako bisitak egiteko aukera emango duen beste espazio kultural bat dauka. Urritik aurrera, hala nahi dutenek, San Frantzisko komentuko aztarnategia bisitatu ahal izango dute. Bilboko Berreginen Museoak kudeatuko ditu bisita horiek.

FacebookTwitterDiggDeliciousGoogle BookmarksRedditLinkedinRSS FeedPinterest