Gaurkotasuna

Berreginen Museoak eskaintzen dizkizuen jarduera eta ekitaldiei buruz informa zaitez.

Berriak

Euskal Museoak eta Bilboko Berreginen Museoak emakumeen berdintasunari buruzko bi jardunaldi antolatu dituzte martxoaren 8a ospatzeko

Asteartea, 20 Otsaila 2018 09:44

Bidea: Gaurkotasuna

"Emakumeen aztarnen atzetik" bisita gidatua eta "Nire edertasuna marrazten" tailerra

 

  • Bi instituzioek emakumeen zeregina balioetsi nahi dute.
  • Euskal Museoak bisita gidatua antolatu du martxoaren 8an, osteguna, 18:00etan. Bisitan, euskal lanbide tradizional batzuetan emakumeek egin duten lana aztertuko da.
  • Artelan Berreginen Museoak emakumeei zuzendutako marrazketa-tailerra antolatu du martxoaren 10ean, larunbata, egun osoan (matrikula: 10€).
  • Bi jardueretan parte hartzeko, inskripzioa egin behar da aldez aurretik, telefono honetara deituta: 94 415 02 31.

 

Euskal Museoak eta Bilboko Berreginen Museoak emakumeen zeregina balioetsi nahi dute, eta, hortaz, bi ekitaldi antolatu dituzte Emakumeen Nazioarteko Eguna, martxoaren 8a, dela eta. Hala, bada, martxoaren 8an (Euskal Museoan) eta 10ean (Artelan Berreginen Museoan), bisita gidatu bat eta marrazketa tailer bat izango dira, hurrenez hurren, emakumeek emakumeentzat pentsatuta. Era horretan, Bizkaiko bi instituzioek berariaz nabarmendu nahi dute emakumeek egungo gizartean betetzen duten zeregin garrantzitsua.

 

Lehenengo hitzordua martxoaren 8an izango da, 18:00etan, Euskal Museoan. Bisita gidatu berezia izango da, "Emakumeen aztarnen atzetik" izenekoa. Museotik egingo den ibilaldian, itsasoari, industriari, baserriari eta etxeari lotutako euskal lanbide tradizionalak hartuko dira hizpide; emakumeek funtsezko zeregina bete dute haietan. Gainera, ziurrena, istorioak sortuko dira, euskal emakumerik ezagunen biografia batzuk oinarritzat hartuta. Azkenean, instituzioak berak duen egitura aztertuko da, historikoki emakumeek zuzendu baitute eta plantilla ere gehienbat emakume teknikariek osatzen baitute.

 

Bisitan parte hartzeko, izena eman beharko da aurrez, 94 415 02 31 telefonora deituta. Gehienez 30 lagunentzako tokia izango da.

 

Bigarren hitzordua martxoaren 10ean izango da, Artelan Berreginen Museoan, 10:00etatik 14:00etara eta 16:00etatik 20:00etara. Bea Apariciok eta Susana Carramiñak "Nire edertasuna marrazten" izeneko tailerra eskainiko dute. Jarduera emakumeei zuzenduta dago. Feminismotik abiatuta, zalantzan jarri nahi da edertasunari eta emakumeen gorputzei buruzko begirada patriarkala, eta marrazketaren bidez aukera eman nahi da berezko begirada eraikitzeko. Tailerra teoriko-praktikoa izango da, eta, parte hartu ahal izateko, marrazketako jakintzak eduki beharko dira aldez aurretik. Azken batean, tailer honetan, berezko begirada landu, eta generoak begirada eraikitzean duen zeregina aztertu nahi da.

 

Parte hartu nahi duten emakumeek aldez aurretik eman beharko dute izena telefono honetan: 94 415 02 31. Matrikularen prezioa 10 euro dira, eta guztira 15 plaza daude.

 

EUSKAL MUSEOKO BISITA GIDATUARI BURUZKO OINARRIZKO INFORMAZIOA

Eguna: Martxoaren 8a

Ordua: 18:00

Prezioa: Doan

Hizkuntza: Gaztelania

Biltzeko tokia: Euskal Museoa (Unamuno plaza 4)

Aurretiazko inskripzioa: 94 415 02 31

 

ARTELAN BERREGINEN MUSEOKO MARRAZKETA TAILERRARI BURUZKO OINARRIZKO INFORMAZIOA

Eguna: Martxoak 10

Ordua: 10:00etatik 14:00etara eta 16:00etatik 20:00etara

Prezioa: 10 euro

Hizkuntza: Gaztelania

Biltzeko tokia: Artelan Berreginen Museoa (San Frantzisko 14)

Aurretiazko inskripzioa: 94 415 02 31

Euskal Museoak eta Bilboko Berreginen Museoak errealitate birtuala biziko dute, Harrobia Ikastolaren lankidetzari esker

Osteguna, 15 Otsaila 2018 13:54

Bidea: Gaurkotasuna

Proiektuak gaur goizean aurkeztu dira Bilboko formazio zentroan, eta “3D animazioak, bideo-jokoak eta ingurune elkarreragileak” goi-mailako zikloko 2. mailako ikasleek garatu dituzte.

Bizkaiko bi museoez gain, Berreginen Museoaren menpeko San Frantziskoko Komentu Zaharraren Aztarnategiak ere bere proiektua du.

 

Euskal Museoak eta Bilboko Berreginen Museoak lankidetza sinatu dute Harrobia Ikastolarekin, eta emaitza gaurtik aurrera egongo da ikusgai. Gaur goizean, Bilbao Bizkaia Museoak eta Hezkuntza Zentroko ordezkariak egon diren ekitaldi batean, Bilboko Lanbide Heziketako Zentroko “3D animazioak, bideo-jokoak eta ingurune elkarreragileak” ikastaroko 2. mailako ikasleek azken hilabeteetan landu dituzten Errealitate Birtualeko proiektuak aurkeztu dituzte. Aurkeztutako 6 proiektuetatik 3 Euskal Museokoak, Berreginen Museokoak eta San Frantziskoko Komentu Zaharraren Aztarnategikoak dira. Momentuz, proba pilotu bat da, eta ez da erabilgarri egongo publikoarentzat, oro har.

 

2017an, ikasleek espazio ezberdinak bisitatu dituzte, eta Euskal Museoko eta Bilboko Berreginen Museoko taldearen laguntza izan dute. Euskal Museorako, ikasleek bisita birtuala prestatu dute euskal txabola tradizional batera; bertan, artzainek gazta egiten zuten, besteak beste. Aplikazioari esker, jarduera hori bera egin daiteke. Berreginen Museoari dagokionez, proiektuaren barruan, egungo bildumako pieza esanguratsuenetako batzuk behatu, jainkoak ezagutu eta eurekin elkarreraginean aritu gaitezke.  Amaitzeko, San Frantziskoko antzinako komentuak ibilbide birtual bat dauka bertako aretoetatik, XV. mendean nolakoak ziren ikusteko.

 

Ikasleak lan merkatuan modu eraginkorrean sartzeko, Harrobia Ikastolak, Eusko Jaurlaritzako Lanbide Heziketako Sailburuordetzak sustatutako ETHAZI metodologiaren bidez, ikasleak lantaldetan antolatzen ditu, enpresa edo proiektuen benetako arazoei konponbide erreala eskaintzeko. Metodologia horrek lan-merkatuak eskatutako eskumen eta gaitasunak indartzen ditu, teknikoez harago. Autonomia, talde lana, bezeroekiko tratua, proiektuen kudeaketa, arazoen konponketa eta abar lantzen dira.

 

Jardunaldi honetan aurkeztutako beste proiektu batzuk “Simulación oficina de Lanbide en la Plaza de la Cantera”, “Pantallas Amigas” eta “Sala scape para el bar Azzurro” izan dira.

 

Zalantzarik gabe, oso lankidetza interesgarria da Bilbao Bizkaia Museoak erakundearen eta aipatutako ikastetxearen artean ezarritakoa. Horri esker, Harrobia Ikastolako ikasleek harreman zuzena izango dute errealitatearekin, eta Bizkaiko bi museo horiek bilduma ikusteko modu berriak deskubritzeko aukera izango dute.

Ostegun honetan, Partenoiko Panateneen Frisoko olinpiar jainkoak izango dira Bilboko Berreginen Museoaren “Artelana bere testuinguruan” zikloko hitzaldiko protagonistak

Osteguna, 15 Otsaila 2018 13:30

Bidea: Gaurkotasuna

Bilboko erakundeak bere hitzaldi arrakastatsua emango du greziar eskultura klasikoaren maisulanetako bat bihurtu den behe-erliebe horri buruz hitz egiteko. Hitzaldi eta bisita banaren bidez (osteguna, hilak 22, 18:00etan, sarrera doan), artelanaren erreferentzia artistikoak eta historikoak aztertuko dira

 

Ostegun honetan, hilaren 22an, hitzaldiak artelan gonbidatu oso berezia izango du: Partenoiko Panateneen Frisoko ekialdeko eremuan agertzen diren olinpiar jainkoak. Mota honetako jarduerei esker, Bilboko Berreginen Museoko bilduman dauden piezak sakonago ezagut ditzakegu. Halaber, museoaren patronoak, hots, Bilboko Udala eta Bizkaiko Foru Aldundia aipatu behar ditugu, Museoak egiten dituen proiektu guztietan laguntzen baitute. Hitzaldiak doakoak dira, eta 18:00etan hasiko dira.

 

Oraingoan, Museoko teknikari eta hitzaldiaren arduradun Itziar Martijak behe-erliebean agertzen diren olinpiar jainkoei buruz hitz egingo du, eta, haietatik abiatuz, eta Museoan martxan dagoen Afrodita. Caos. Desioa. Sexo. Amodioa? aldian behingo erakusketaren ataletako bat lantzen duen gaia oinarri hartuta, edertasunaren jainkosak jainko horiekin zituen harremanak aztertuko dira.

 

Beste jainko eta jainkosa batzuk Afroditarekin harremanetan jartzen diren kontakizun mitologikoetatik abiatuta, hitzaldiak horien azpiko esanahian sakonduko du. Hasteko, diskurtsoak Afroditaren ezkontide eta jainko errementaria zen Hefesto izango du ardatz, eta, gero, jainkosaren maitale nagusietako bat aztertuko du: Ares. Protagonista izango dira, halaber, Zeus eta jainkosarekin ondorengoak izan zituzten beste jainko batzuk. Gainera, Greziako mitologiaren arabera, Afroditaren sedukzio-ahalmenek ez zuten eraginik hiru jainkosatan: Artemisa, Atenea eta Hestia. Haiei buruz ere hitz egingo da.

 

Bertaratutakoek pieza horren xehetasun guztiak ezagutu ahalko dituzte hitzaldi entretenigarri baten bidez.

 

Jarduera osatzeko, behe-erliebea zuzenean ikusi ahal izango da bisitan. Zikloa dagoeneko erreferente bihurtu da Museoaren programazioan, eta horren alderdi pedagogikoa eta kulturala finkatzen du. Bilboko Berreginen Museoa, Mariaren Bihotzaren eliza zaharraren egungo egoitzan 2006an berriz zabaldua, Bizkaiko hiriburuko zaharrenetakoa da. Duela 80 urte sortu zuten, eta mota horretako onenetakoa da, erakutsitako berreginen aukeraketagatik eta kalitateagatik.

 

“ARTELANA BERE TESTUINGURUAN” ZIKLOA

•           Data: osteguna, 2018ko otsailaren 22a

•           Ordua: 18:00etan

•           Tokia: Bilboko Berreginen Museoa

•           Sarrera doan. Ez da aurretik erreserbatu behar.

 

Museoaren ohiko ordutegia:

•           Asteartetik larunbatera: 10:00etatik 13:30era eta 16:00etatik 19:00etara

•           Igandeetan: 10:00etatik 14:00etara

•           Itxita: astelehen eta jaiegunetan.

Swingak dantzan jarriko du Bilboko Berreginen Museoa (Otsailaren 11n)

Astelehena, 05 Otsaila 2018 09:35

Bidea: Gaurkotasuna

Otsailaren 11n, erakunde bilbotarrak Swing Museoan! jarduera arrakastatsua eskaintzen jarraituko du. Jarduera horrek artelanen artean dantza egiteko aukera eskaintzen du.

 

Bilboko Berreginen Museoak ez dio inoiz dantzatzeari uzten, eta, oraingoan, Swing Museoan! ekimen ospetsuarekin dator.Hilabete bakoitzeko bigarren igandean, 11:30 eta 13:30 artean, Bilboko erakundea dantza-pista handi bihurtuko da, eta, horrela, nahi duten guztiek musikaren erritmoan gozatu ahal izango dute. Jarduera hau Museoak eta Swing Side Bilbao elkarteak antolatzen dute, doakoa da, eta bertaratzen direnek aipatutako dantza-modalitateaz gozatzeko aukera dute, leku paregabe batean, eskulturen artean. Aurreko denboraldiko arrakasta izugarriaren ostean, Swing Museoa Bilboko jarduera izarretako bat izatera heldu da. Gero eta dantzari gehiago etortzen dira Mariaren Bihotza eliza izandakora (San Frantzisko 14), bertan baitago Hiribilduko Berreginen Museoa, Swingaz gozatzeko. Genero musikal hori Estatu Batuetan sortu zen, 1920ko hamarkadaren amaieran.

 

XX. mende hasierakoak izan arren, swingetik eratorritako dantzak guztiz modan daude. Ez da dantza hutsa: horren atzean, komunitate bat dago, bai eta oso osagai sozial zabala ere, non jendea musikaren eta dantzaren bitartez komunikatzen baita, uneak partekatzeaz gain.

 

Swing Museoan! ekimena dantza egiteko eta swing musika sustatzeko etorri da, baina, baita ere, dantza bere habitatetik ateratzeko eta testuingurutik kanpora jartzeko: dantza kalera eramateko, edo, kasu honetan bezala, museo batera eramateko, eta pertsonen, artearen, musikaren eta dantzaren topalekua sortzeko.

Otsailaren 14an, Maiteminduen Egunean, Bilboko Berreginen Museoa maitasun-istorio suntsitzailez beteko da

Astelehena, 29 Urtarrila 2018 11:08

Bidea: Gaurkotasuna

Erakundeak aldi baterako erakusketa bat dauka orain ikusgai Afrodita jainkosaren inguruan, eta hitzaldi bat antolatu du San Balendin egunean (18:00), haren seme Erosen izaerak eragiten zuen kaosari buruz hitz egiteko.

Jarduera doakoa izango da, eta ez da beharrezkoa izango aldez aurretik izena ematea.

 

Antzinako greziarrek maitasunaren inguruko oso kontzeptu ezberdina zuten gaur egungoaren aldean.Hori dela eta, bihotzez, maitasun-geziez eta kupido garaikideez hitz egiten ez duten istorioekin ospatu nahi du aurten Bilboko Berreginen Museoak Maiteminduen Eguna.Horrela, Bizkaiko erakundeak hitzaldi bat antolatu du otsailaren 14rako, 18:00etan, Eros jainkoaren inguruan.Afroditarekin batera doan hego eta arkodun umearen irudia buruan badugu ere, bertsio ugari daude pertsonaia horren jatorri eta leinuari buruz.

 

Haren jatorriaren inguruko hainbat bertsioren berri izan badugu ere –ahoz kontatu ohi ziren eta oraindik ere kontatzen dira–, K.a. VI. mendean egiaztatu zen lehenengo aldiz Afroditaren (edertasunaren eta desioaren jainkosa) eta Aresen (gerraren eta indarkeriaren jainkoa) seme Erosen jaiotza.

 

Gaur egun Berreginen Museoan ikusgai dagoen Afroditari buruzko aldi baterako erakusketaren pausoei jarraituko die hitzaldiak; izan ere, greziarrentzat gaur egun esleitu nahi zaion izaera ez zeukan jainko batean jartzen du arreta.Haientzat, pertsonaia kontrolaezina zen, kaotikoa, suntsigarria, tupustekoa, traizioz erasotzen duena eta aurka egin ezin zaiona.

 

Lehenik eta behin, Erosen izaerari buruz hitz egingo da.Bere jatorri mitologikoa eta harekin lotura duten beste jainko batzuk.Ondoren, euren eguneroko bizitzekin erlazionatutako metaforen bitartez, greziarrek literaturan eta artean jainkoaren botere suntsitzailea adierazteko erabilitako moduan oinarrituko da hitzaldia.Jardunaldia amaitzeko, Afrodita-Venus eta Eros-Cupido pertsonaiek hizkuntza modernoetan utzitako arrastoari buruz hitz egingo da, sarritan erabiltzen diren terminoen bitartez.

 

Eros, deskubritzeko dagoen izaera daukan jainkoa.Izateko eta ekiteko era indartsu horretatik abiatuta, hainbat istorio kontatuko dira Bilboko Berreginen Museoko teknikari Itziar Martijak eskainiko duen hitzaldian.Zalantzarik gabe, istorio-zati horiei esker, Maiteminduen egun ospetsua beste era batera ikusi ahal izango dugu.Hitzaldiak ordubete iraungo du, gutxi gorabehera, eta ez da beharrezkoa izango aldez aurretik izena ematea.

 

Jarduera honen xedea da San Balendin Eguna beste era batera ospatzea, arte klasikoari buruz gehiago ikasiz, eta eguna Museo honek gordetzen dituen piezekin maiteminduta amaitzea.

 

Ekitaldiaren inguruko informazioa

•           Eguna:2018ko otsailaren 14a

•           Ordua: 18:00

•           Lekua:Bilboko Berreginen Museoa (San Frantzisko kalea 14)

•           Ez da beharrezkoa aldez aurretik izena ematea.

Euskal Museoaren eta Berreginen Museoaren bisitari kopurua %29 handitu da 2017an

Azteazkena, 24 Urtarrila 2018 12:23

Bidea: Gaurkotasuna

Bi erakundeek, erakusketa eta jardueren programa zabalari esker, euskal kulturaren eta arte klasikoaren Bilboko erreferente izatea lortu dute

 

Urte berri bat hasi da, eta heldu da iazkoaren azterketa egiteko ordua. Hala egin dute Bilboko Euskal Museoak eta Berreginen Museoak, San Frantziskoko komentu zaharraren aztarnategiarekin batera, eta emaitza benetan pozgarria da. Bi museoak barne hartzen dituen Bilbao Bizkaia Museoak erakundearen bisitari kopurua, oro har, %29,30 handitu da 2017an, eta, hala, 18.800 bisitari gehiago izan zituen iaz. Euskal Museoak, 2016an, 55.066 bisitari izan zituen, eta 2017an, 68.324. Bestalde, Bilboko Berreginen Museoak 5.590 bisitari gehiago izan ditu azken urtean, eta, horrenbestez, 9.257 bisitari izatetik 14.847 bisitari izatera igaro da. Azken horretako bisitari kopurua, batez ere, irailean San Frantziskoko komentu zaharreko aurriak ireki ondoren suspertu da; 3.000 pertsona inguruk bisitatu dute gune hori, ireki ondorengo lehen asteetan.

 

Bi lekuetan ikusgai dauden erakusketa iraunkorrei, 2017an programatu diren aldi baterako erakusketei eta jarduera programa zabalari esker lortu da bisitari kopurua igotzea. Euskal Museoak euskal kulturan murgilarazten du bisitaria; sustraietaraino bidaiatzeko aukera ematen dio, eta izateko eta bizitzeko modu bat erakusten dio. Espazio horretan, iaz hainbat erakusketa txundigarri ireki ziren; besteak beste, “Frivolité. XVIII. mendeko jantziak” eta “Bilboko Erraldoi eta Buruhandien erakusketa” mitikoa. Halaber, bertan egin dira “Zinemaz Blai” zinema ziklo ezaguna, Basque Fest, Gau Zuria, Gabonetako tailerrak edo ekitaldiz betetako Ondarearen Europako Jardunaldiak.

 

Bestalde, Bilboko Berreginen Museoan abiarazi zen 2017an Afrodita jainkosari eskainitako aldi baterako erakusketa. Erakusketa iraunkorraz gainera, erakundeak beste zenbait jarduera arrakastatsu antolatu ditu, esate baterako, “Swing Museoan!”. Halaber, San Frantziskoko komentu zaharraren aztarnategia ireki du, eta bertan egin dira zenbait ekitaldi, adibidez, azoka solidario jendetsua. Era berean, zenbait ekitaldi hartu ditu, besteak beste, “Bilbao Black Experience” eta “Gau Irekia”, eta beste urte batez “Artelana bere testuinguruan” hitzaldi ziklo arrakastatsua antolatu dute.

 

Horri guztiari gehitu behar zaizkio landutako hezkuntza programa bat, egun seinalatuetan egindako bisita gidatu bereziak, ikastetxeekin egindako jarduerak eta bi museoek hartzen dituzten aldi baterako erakusketekin lotutako ezin konta ahala ekitaldi. Normalean, publiko orokorrari zuzendutako doako jarduerak izaten dira, eta leku guztiak betetzen dira. Gainera, prentsaurrekoak, aurkezpenak, beste erakunde batzuen erakusketak edo hirian antolatutako beste ekitaldi batzuk bi museo ezagun hauen egunerokoan txertatuta daude.

Botticelliren Venusen Jaiotza izango da protagonista, ostegun honetan, Bilboko Berreginen Museoko «Artelana bere testuinguruan» hitzaldi zikloaren barnean (osteguna, urtarrilak 25, 18:00etan)

Osteguna, 18 Urtarrila 2018 09:44

Bidea: Gaurkotasuna

Erakundeak antolatu ohi dituen hitzaldi arrakastatsu horietan, Errenazimenduko margo garrantzitsuena den koadroa hartuko da hizpide oraingoan. Hitzaldi eta bisita baten bidez aztertuko dira koadroko erreferentzia artistiko eta historikoak (osteguna, urtarrilak 25, 18:00etan).

 

Ostegun honetan, hilak 25, obra oso berezi bat izango da mintzagai: Botticelliren Venusen Jaiotza. Horrelako jarduerei esker, hobeto ezagut daitezke Bilboko Berreginen Museoaren bildumako zenbait pieza edo espazio. Era berean, Bilboko Udala eta Bizkaiko Foru Aldundia aipatu behar ditugu; izan ere, museoaren babesleak dira, eta museoaren proiektu guztiak babesten dituzte. Hitzaldiak 18:00etan hasiko dira eta doakoak dira.

 

Oraingo honetan, Itziar Martija Museoko teknikariak hitz egingo du aipatutako obrari buruz. Zalantzarik gabe, Errenazimentuko koadrorik famatuena da, baita, seguru asko, Artearen Historia osokoa ere. Botticellik gai mitologiko hau karrera artistikoko mailarik gorenean zegoela margotu zuen, eta inspirazio iturri izan zituen Florentziako Neoplatonismo giroko ideia humanistikoak.

 

Obra nork eskatu zion seguru ez badakigu ere, badirudi Lorenzo di Pierfrancescoren (Lorentzo Medicikoaren lehengusua) enkargu bat izan zela, landa inguruko bizitoki batean jartzeko. Argitu gabeko beste kontu bat hau da: ez dakigu nor izan zen Venusen figura egiteko eredu gisa hartu zuen emakumea, nahiz eta Simonetta Cattaneo Vespucci dela pentsatu nahi izan den. Genovako emakume gazte hori, Marco Vespucciren emaztea, Botticelliren modelo eta musa izateaz gainera, Giulio Medicikoaren, hau da, Lorentzo Medicikoaren anaiaren maitasun platonikoa izan zen.

 

Haren omenez, Giulianok lehiaketa bat antolatu zuen 1475ean. Lehiaketa horretarako idatzi zuen Angelo Poliziano poetak obra poetiko bat, eta, dirudienez, Botticelliren inspirazio iturri izan zen, Venusen jaiotzaren eszena irudikatzeko orduan.

 

Hitzaldi entretenigarri baten bidez, lan horren xehetasun guztiak ezagutu ahal izango dituzte bertaratutakoek. 

Hitzaldiaz gainera bisita bat egongo da, eta aukera egongo da koadroa zuzenean ikusteko. Museoaren alderdi kulturala eta pedagogikoa indartzen dituen ziklo hau jada erreferente bat da programazioan. Bilboko Berreginen Museoa, 2006ko azaroan ireki zen gaur egungo eraikinean, hain zuzen, Mariaren Bihotza, Bilboko elizarik zaharrenetako bat, zegoen lekuan. Duela 80 urte sortu zen, eta mota horretako museorik onenetako bat da, ikusgai dauden erreprodukzioen aukeraketa eta kalitatea dela-eta.

 

«ARTELANA BERE TESTUINGURUAN» ZIKLOA

•           Eguna: 2018ko urtarrilak 25, osteguna.

•           Ordua: 18:00etan.

•           Lekua: Bilboko Berreginen Museoa.

•           Sarrera librea; aurrez erreserbatzeko beharrik ez.

 

Museoaren ordutegia:

•           Asteartetik larunbatera: 10:00etatik 13:30era eta 16:00etatik 19:00etara

•           Igandeak: 10:00etatik 14:00etara

•           Itxita: astelehenak eta jaiegunak.

2017ko Gabonetako tailerrak arrakastatsuak izan dira

Asteartea, 09 Urtarrila 2018 10:08

Bidea: Gaurkotasuna

Euskal Museoak eta Berreginen Museoak beste urte batez lortu dute Gabonetako jardueretan plazak erabat betetzea

 

Oporraldi bete-betean, eta Olentzeroren bisita jaso eta egun gutxira, etxeko txikienek aukera izan dute Bilboko Euskal Museoak eta Berreginen Museoak antolatutako Gabonetako ohiko tailerrez gozatzeko.Oraingo honetan, oso lurrin pertsonala prestatu dute Afroditaren begiradapean, San Frantziskoko komentuko aurrietan indusketa lanak egin dituzte, lore bat landatu dute Berreginen Museoan, eta, are gehiago, Gabonetako mahaia prestatzen ikasi dute Euskal Museoan.Hori guztia, Museoko langileen eskutik erakunde bien bilduma ezagutzen zuten bitartean.Guztiek ikasi dute jolastuz, eta berriro etortzeko gogoz joan dira. Laster ikusiko dugu elkar, lagunak!

Swingak dantzan jarriko du Bilboko Berreginen Museoa urtarrilaren 14an

Azteazkena, 03 Urtarrila 2018 10:54

Bidea: Gaurkotasuna

Urtarrilaren 14an, erakunde bilbotarrak Swing Museoan! jarduera arrakastatsua eskaintzen jarraituko du. Jarduera horrek artelanen artean dantza egiteko aukera eskaintzen du

 

Bilboko Berreginen Museoak ez dio inoiz dantzatzeari uzten, eta, oraingoan, Swing Museoan! ekimen ospetsuarekin dator.Hilabete bakoitzeko bigarren igandean, 11:30 eta 13:30 artean, Bilboko erakundea dantza-pista handi bihurtuko da, eta, horrela, nahi duten guztiek musikaren erritmoan gozatu ahal izango dute. Jarduera hau Museoak eta Swing Side Bilbao elkarteak antolatzen dute, doakoa da, eta bertaratzen direnek aipatutako dantza-modalitateaz gozatzeko aukera dute, leku paregabe batean, eskulturen artean. Aurreko denboraldiko arrakasta izugarriaren ostean, Swing Museoa Bilboko jarduera izarretako bat izatera heldu da. Gero eta dantzari gehiago etortzen dira Mariaren Bihotza eliza izandakora (San Frantzisko 14), bertan baitago Hiribilduko Berreginen Museoa, Swingaz gozatzeko. Genero musikal hori Estatu Batuetan sortu zen, 1920ko hamarkadaren amaieran.

 

XX. mende hasierakoak izan arren, swingetik eratorritako dantzak guztiz modan daude. Ez da dantza hutsa: horren atzean, komunitate bat dago, bai eta oso osagai sozial zabala ere, non jendea musikaren eta dantzaren bitartez komunikatzen baita, uneak partekatzeaz gain.

 

Swing Museoan! ekimena dantza egiteko eta swing musika sustatzeko etorri da, baina, baita ere, dantza bere habitatetik ateratzeko eta testuingurutik kanpora jartzeko: dantza kalera eramateko, edo, kasu honetan bezala, museo batera eramateko, eta pertsonen, artearen, musikaren eta dantzaren topalekua sortzeko.

BILBAO BLACK EXPERIENCE Berreginen Museoan. Gau Irekiaren seigarren edizioak 100 gizarte eta kultura aktibitate baino gehiago eskainiko ditu egun berean San Frantzisko, Bilbo Zaharra eta Zabala auzoetan

Astelehena, 11 Abendua 2017 12:44

Bidea: Gaurkotasuna

BILBAO BLACK EXPERIENCE. Black Music & Kultura Festival 2017
    Alain Concepción & the Soul Men

16/12/2017

20.00

Berreginen Museoan

 

Sarean Elkarteak abenduaren 16an Gau Irekia gizarte eta kultura festa antolatuko du, Bilboko San
Frantzisko, Bilbo Zaharra eta Zabala auzoetan. Egun berean eta doakoak diren ehun ekintza
baino gehiago egongo dira, hainbat diziplinetakoak: kontzertuak, antzerkiak, tailerrak, esposizioak,
performance-ak, kaleko artea eta aktibismoa.


Gau Irekia 2012. urtean jaio zen, helburu ezberdinekin. Alde batetik auzo hauetan dauden erakunde,
artista eta mugimendu kultural ezberdinak indarrean jartzea , eta bestetik bertako agente guzti
horien arteko erlazioak suspertzea.


Beste jaialdi askorekin alderatuz berezitasun garrantzitsu bat dauka Gau Irekiak, programazioa modu
parte-hartzailean antolatzearena hain zuzen. “Behetik” antolatzen den ekintza da, deialdi ireki baten
bitartez, non gizartearen edozein bakarkako edo kolektibok bere aktibitatea proposatu dezaken.
Festa honek, kultura ireki, parte-hartzaile eta solidarioaren apustua egiten du. Gau Irekia, Bilbon
urtean zehar ematen den kultura herrikoiaren erakustaldirik emankorrena izan daiteke.


Jarduerak eta Nobedadeak 2017
Gau Irekiak, bere seigarren edizioan, 100 parte-hartzailetik gora bilduko ditu 50 gune baino
gehiagotan (artistak, erakundeak, zein kolektibo ezberdinak). Espazio publikoak berebiziko garrantzia
hartzen du jaialdian: Doctor Fleming, Bilbo Zaharra eta Mariaren Bihotza Plazek (azkenengo hau
jaialdiaren epizentroa), kontzertuak, antzerkia edo dantza aktibitate ugari jasoko dituzte, eguerditik,
goizaldera arte.


Gau Irekiak mota guztietako guneekin kolaboratzen du, Espazio Instituzionalak; Berreginen Museoa
edo auzoetako Udaltegiak adibidez, baina baita taberna, denda eta edozein komertziorekin. Urtero
bezala, kolektibo kultural independente asko egongo dira programan (Okela, Consonni edo Pikara
Magazine adibidez) eta gizarte izaera zehatzagoa duten auzo elkarte eta GKE-ak baita.

 

Hiru auzoak guztiz murgiltzen dira jaialdian, horregatik ekintza oso ezberdinak suertatzen dira. Gau
Irekira hurbiltzen denak, adibidez, auzoko ile-apaindegi batean aktibitate bat ikusi dezake, baina baita
modan dagoen taberna batean ere, edo normalean itxita dagoen pintore baten tailerrean.


Aurten, berebiziko garrantzia eman zaio kreazio artistikoan sortzen diren prozesuei. Jaialdian
eskaintzen diren aktibitateak laburrak eta galkorrak ematen dute, baina hilabete askotako lana eta
zaintza daramate atzean. Horregatik, artista edo talde batzuen prozesuak jarraitu ditugu, beraien
kontaketa sakon bat egin eta daukaten garrantzia azpimarratzeko.


Adibidez, auzoan bizi den aneguria rap abeslariak eta Jesús Arturo Ara kantautore eta gitarristak
elkarrekin egin dute lan hainbat saioetan, “Yo me doy el tono” abestia sortzeko. Prozesu osoa
TwoBaskos kolektiboak filmatu du, eta emaitza Gau Irekian bertan aurkeztuko da bideo labur baten
formatuan.


Gau Irekia 2017ko programazioan, aberastasun interkulturala, euskararen presentzia edo
disiziplinen aniztasuna bereizten dira.


Musika afrikarra presente egongo da, folkloretik estilo garaikidera, Yoruba & Friends, Novisi
Percusión, edo Betto Snay raperoren eskutik. Parte hartuko dute baita Madrileko Afroconciencia
kolektiboaren kide diren Yeison García López eta Lucía Mbomio, beraien liburuak aurkeztuz.


Gainera, adin guztietako publikoentzako lekua egongo da. Txikientzako ekintzak, Txaloka edo
Olentzeroaren Sekretua antzerki-lanak adibidez, eta adinekoak kontuan hartzen dituztenak baita,
Mama Crea taldeak Igurco Bilbozahar erresidentzian egingo duena esaterako.


Gau Irekia festa ere badenez, kulturaren alde ludikoa ospatzeko parada egongo da. Goizaldera arte
dantzatuko dugu Yellow Big Machine, Rrucculla, Mazmorra eta Arrakala taldeekin, edo Bilbao Black
Experience jaialdiaren kontzertuekin.


Sarean Kultur Elkartea
Sarean, auzokideen topaketarako gune bat da, kultura-adierazpen orori irekia, gizarte kohesioa eta
garapen komunitarioa indartzeko. 80. hamarkadatik auzo hauetan eman den mugimendu auzotar eta
artistikoaren emaitza delarik.


Sarean elkartearen topagunea Mariaren Bihotza Plazako bere lokala da, non azken bi urte hauetan
hasiberri duen garaian, 400 ekintza baino gehiago antolatu dira: kontzertuak, antzerkiak, tailerrak,
erakusketak, hitzaldiak, performance-ak etabar.

FacebookTwitterDiggDeliciousGoogle BookmarksRedditLinkedinRSS FeedPinterest